Коле Ангеловски

Роден е во скопје на 14.03.1943 година. Филмски, театарски и телевизиски актер и режисер. Дипломира актерство на Академијата за театар, филм, радио и телевизија во Белград. На филм, како актер, дебитира уште како студент, 1962 година, во југословенскиот филм САША, на режисерот Раденко Остоиќ и ја добива дебитантската награда на Филмскиот фестивал во Пула (1963), а 1965 година на истиот фестивал и наградата Најдобар млад актер, за улогата во филмот ДА СЕ ДОЈДЕ И ДА СЕ ОСТАНЕ на режисерот Бранко Бауер.

Од 1967 година работи во Драмскиот театар во Скопје. Ангеловски има режирано два играни филма. За својот режисерски првенец ТАТКО (КОЛНАТИ СМЕ ИРИНА - 1973) ја добива престижната Награда `Кокањ Ракоњац` на филмскиот фестивал во Пула.Тој е автор и на втората филмска комедија во македонската кинематографија по МИРНО ЛЕТО на Д. Османли, ВИКЕНД НА МРТОВЦИ, за којшто ја добива Наградата `Златна рипка` за режија, на Фестивалот на филмска комедија во Голубац, СР Југославија. Ангеловски се занимава и со театарска режија и има режирано голем број театарски претстави.

Награди: 1963 ФЈИФ Пула, Награда за најдобар дебитант / `Саша`
1965 ФЈИФ Пула, Награда `Најдобар млад актер` / `Да се дојде и да се остане`
1973 ФЈИФ Пула, Награда `Кокан Ракоњац` за најпоетичен филм на режисер дебитант /`Татко`
1988 Фестивал на филмска комедија Голубац (Југославија), Главна награда за режија / `Викенд на мртовци`
1988 Фестивал на филмска комедија Голубац (Југославија), Трета награда од публиката / `Викенд на мртовци`

Филмографија:
1966:    До победата и по неа (Споредна улога)
1967:    Македонска крвава свадба (Главна улога)
1967:    Мементо (Споредна улога)
1967:    Патека (Сценарио)
1969:    Време без војна (Споредна улога)
1971:    Жед (Главна улога)
1971:    Македонски дел од пеколот (Главна улога)
1973:    Татко (Колнати сме, Ирина) (Режија, Сценарио)
1979:    Додека водата тивко шумоли (Режија)
1980:    Оловна бригада (Главна улога)
1981:    Црвениот коњ (Главна улога)
1982:    Јужна патека (Главна улога)
1984:    Нели ти реков (Главна улога)
1988:    Викенд на мртовци (Режија)