Баклава

Баклава е музички состав со минималистички музички концепт: звукот  го градат само еден женски вокал и два жичани и ударни народни инструменти -  тамбура и деф. Трет голем предизвик во музицирањето: едноставност и непретенциозност.

Освен за преработките на композиции од македонскиот фолклор, светогледот на групата Баклава е отворен и за други фолклорни традиции. Но клучниот предизвик е создавање на авторска музика  во жив дијалог со естетските дострели на македоскиот мелос.
 
Баклава е основана во 2005 година, како резултат на спојот на индивидуалните музички искуства на нејзините членови во сопствени музички проекти, но и во соработка со други музичари и групи. По издавањето на првиот албум насловен `Баклава` (2007) на местото на Александар Стаматов (од првата постава) во групата влегува Владимир Мартиновски.

`Калемар` е издаден во октомври 2008 година. Додека нивниот прв албум `Баклава` е концертен, `Калемар` е нивниот прв студиски албум. Се состои од 14 композиции од кои 11 се компонирани од бендот, а три се македонски традиционални песни.